Պերմակուլտուրային լուծումներ հողի դեգրադացիայի դեմ

Ծրագրի մանրամասներ և արդյունքներ

Ծրագրի նկարագիր

  Հայաստանում հողատարածքների ավելի քան 80 տոկոսը ենթարկվում է դեգրադացիայի արդյունաբերական գյուղատնտեսության, բնակավայրերի ոչ կայուն նախագծման և միջավայրի աղտոտվածության պատճառով: Սա հանգեցրել է տեղական պարենային անապահովության, պարենային ապրանքների գների բարձրացման, բնապահպանական վտանգների, կլիմայի փոփոխության, կենսաբազմազանության և էկոհամակարգերի կորստի:

Նախագիծն առաջարկում է պերմակուլտուրային մեթոդը՝ որպես պարզ, մատչելի և հասարակությանը հասանելի մոտեցում այս խնդիրների լուծման համար: Այս մոտեցումը լայն տարածում է գտնում ամբողջ աշխարհում, սակայն Հայաստանի բնակչության համար դեռ գրեթե չբացահայտված ոլորտ է: Պերմակուլտուրայի առաջարկած լուծումները Հայաստան ներմուծելու համար ծրագիրը նպատակ ունի կրթել և հզորացնել երիտասարդներին՝ ավագ դպրոցի աշակերտների համար մշակված վերապատրաստման մոդուլների միջոցով, որոնք կսովորեցնեն պերմակուլտուրայի սկզբունքներն ու էթիկան՝ զարգացնելով կարևոր գործնական հմտություններ և մտածելակերպ։

Ծրագրի թիմը կստեղծի պերմակուլտուրայի վերաբերյալ առաջին հայերեն կուրսը: Դասընթացների հիման վրա մշակված խաղայնացված քայլերը կօգնեն աշակերտներին վերականգնել դպրոցները շրջապատող լքված տարածքները՝ փոքր տարածքներում իրենց համայնքների համար առատ, առողջ ու բազմազան սնունդ աճեցնելու համար:

Պերմակուլտուրայի վերաբերյալ առցանց բովանդակությունը կներառի գործնական վարժություններ, թեստեր և մուլտիմեդիաներ, որոնց շնորհիվ երիտասարդները կզարգացնեն տեխնիկական հմտություններ՝ ստեղծելու իրենց սեփական պերմակուլտուրային դիզայնը կոնկրետ տարածքի համար: Ծրագիրը նաև կաջակցի պերմակուլտուրայի վերաբերյալ երիտասարդների սեփական նախաձեռնություններին` գովազդելով, գտնելով համապատասխան փորձագետներ և տրամադրելով կառավարման և դրամահավաքի կազմակերպման աջակցություն:

Ծրագիրը կգործի Տաթև համայնքում՝ հետագայում ընդլայնվելու հնարավորությամբ:

Ծրագրի արդյունքներ

Նախագիծը կտա հետևյալ արդյունքները.

• Պերմակուլտուրայի սկզբունքներով վերականգնված 700 քմ հողատարածք, 2 տարի անց այս տարածքի բերքը կպարունակի 150 միամյա և բազմամյա, մեծամասամբ՝ բերքատու բույսեր, կլինեն մեղրատու մեղվաընտանիքներ և հավկիթներ։
• 60 երիտասարդ մասնակից ձեռք կբերի պերմակուլտուրայի մասին գիտելիքներ, քննադատական մտածողության, կզարգացնի ստեղծագործական միտք, կստանա համագործակցության, հաղորդակցության և նախագծերի կառավարման գիտելիքներ ու հմտություններ, ինչը կօգնի հիմնել իրենց սեփական գյուղատնտեսական նախագծերը:
• Տարածքից ստացվող բերքի վաճառք տեղական ձեռնարկություններին՝ հաջորդ տարիների ծախսերը ծածկելու և նախագծի կայունությունն ապահովելու համար։
• Ստեղծված առցանց հայերեն հարթակ՝ պերմակուլտուրայի վերաբերյալ ինտերակտիվ բովանդակությամբ, որը կօգտագործվի նաև այլ դպրոցներում։
• Հայաստանում երիտասարդության շրջանում պերմակուլտուրայի մասին իրազեկվածության բարձրացում սոցցանցերում միկրոուսուցման բովանդակության տեղադրման միջոցով, ներառյալ 15 «reel»-երի ստեղծում: