Դարևսկու իժի-Vipera darevskii պահպանությանը ուղղված միջոցառումների իրականացումը տարածաշրջանի կենսաբազմազանության պահպանության և սոցիալտնտեսական խնդիրների ներդաշնակ լուծման ճանապարհով /Շիրակի մարզ, Աշոցքի տարածաշրջան, գյուղ Ղազանչի/

Դարևսկու իժը գրանցված է Բնության Պահպանության Միջազգային Միության Կարմիր ցուցակում և ՀՀ կենդանիների Կարմիր գրքում` որպես «Կրիտիկական Վիճակում գտնվող» տեսակ:
Էկոլոգիական նեղ հարմարվողականության հետ կապված` Դարևսկու իժի համար առաջնահերթ վտանգ է ներկայացնում ապրելավայրերի դեգրադացիան, որը տեղի է ունենում գյուղատնտեսական կենդանիների չկանոնակարգված արածեցման, խոտհունձի և գյուղատնտեսական այլ նպատակներով հողերի յուրացման հետևանքով:

Ներկայացվող նախագծով նախատեսվում է իրականացնել ՀՀ Շիրակի մարզի Ղազանչի գյուղին հարող Ջավախքի լեռնաշղթայի լանջերի վրա գտնվող Դարևսկու իժի բիոտոպների պահպանությանը նպատակաուղղված մի շարք բնապահպանական միջոցառումներ, որոնք անհրաժեշտ են մինչև այդ տեսակի բիոտոպների ընդգրկումը նոր բնության հատուկ պահպանվող տարածքի` «Արփի լիճ» ազգային պարկի մեջ:

Ծրագիրը նախատեսում է իրականացնել հետևյալ գործողություններ`

• Մետաղական լարով քարակույտերի ցանկապատում, անասունների համար հատուկ անցուղիների պատրաստում և մուտքը արգելող ցուցանակների տեղադրում,
• Ձորակների ներքևի հատվածներում անասունների համար արհեստական ջրարբիացման ջրամբարի կառուցում ,
• Համայնքի ավագանու հետ համատեղ արոտավայրերի կայուն օգտագործման մեխանիզմների մշակում և ներդրում,
• Մեկ խորքային հորի հորատում` համայնքին խմելու տեխնիկական ջրով ապահովելու նպատակով,
• Տեսակի անօրինական որսի և արտահանման հսկողության ուժեղացում,
• Ծրագրի իրականացման ընթացքի վերաբերյալ ֆիլմի նկարահանում,
• Տեղական բնակչության շրջանում բնապահպանական իրազեկության բարձրացում և էկոդաստիարակություն` բուկլետների, բրոշյուրների և ուղեցույցների հրատարակում, ուսուցողական սեմինարների, հանդիպումների անցկացում, այլընտրանքային բնօգտագործման մեթոդների առաջարկների մշակում:

Ծրագրի արդյունքների մասին պատմող ֆիլմը կարող եք տեսնել http://www.youtube.com/watch?v=8PbKgckB5qc (հայերեն տարբերակ) և  http://www.youtube.com/watch?v=BnMsSrLtOXo (անգլերեն տարբերակ)