Recycle It

Ծրագրի մանրամասներ և արդյունքներ

«RecycleIt» նախաձեռնության հիմնական նպատակն է նպաստել Հայաստանում թափոնների տարանջատման և վերամշակման մշակույթի ձևավորմանը`թափոնների տեսակավորման աղբամաններ տեղադրելու և թափոնների կառավարման վերաբերյալ իրազեկվածության բարձրացման միջոցով: Մայրաքաղաք Երևանում և ընտրված գյուղական համայնքներում նախատեսվում է իրականացնել թափոնների տարանջատման և վերամշակման աշխատանքները, ստեղծել թափոնների կառավարման ոլորտում նոր բիզնես հնարավորություններ, բարձրացնել հանրային իրազեկվածությունը թափոնների վերամշակման և վերօգտագործման մասին, նպաստել էկոլոգիական կրթությանը: ՓԴԾ-ի դրամաշնորհի միջոցով ՀԿ-ն նախատեսում է տարբեր տեսակի աղբամաններ տեղադրել 50 հաստատություններում, ներառյալ դպրոցներ, համալսարաններ, կազմակերպություններ, ընկերություններ և նախատեսել հանրության համար հասանելի 10 կետեր պլաստիկի, թղթի, ապակու և մետաղական թափոնների հավաքման համար, որը հետագայում տեղափոխվելու է վերամշակման վայրեր։

Ծրագրով նախատեսվում է նվազեցնել աղբավայրերում վերամշակվող թափոնների քանակը` խթանելով չորս տեսակի կոշտ թափոնների վերամշակումը: Սա առաջին հերթին կնպաստի հողամասերում և աղբավայրերում բաց այրման հետևանքով առաջացած վտանգավոր արտանետումների կրճատմանը, որը առաջացնում է օդի, ջրի և հողի աղտոտում, կենսաբազմազանության կորուստ և առաջացնում է վտանգներ մարդու առողջության համար: Ավելին, նախատեսվում է ացկացնել մրցույթներ, դասընթացներ և հանրային միջոցառումներ տարբեր շահագրգիռ կողմերի համար՝ բարձրացնելու իրազեկվածությունը թափոնների սխալ կառավարման վտանգավոր ազդեցության մասին: Այս գործողությունները կնպաստեն նաև վերամշակման ենթակա թափոնների տարանջատմանը և հավաքմանը:

Նախագծի ակնկալվող արդյունքները.

• Առնվազն 50 ընկերություններում ներկայացված է «Կրճատել -> Վերօգտագործել -> Վերամշակել» մոտեցումը,
• 300 տեսակավորող աղբամաններ տեղադրվել են մոտ 50 հաստատություններում, ներառյալ դպրոցներ, համալսարաններ, կազմակերպություններ, ընկերություններ և հանրության համար հասանելի հավաքման կետեր,
• Ծրագրում ուղղակիորեն ներգրավված են ավելի քան 5000 աշակերտներ և 4000 ուսանողներ, ընդհանուր առմամբ 300,000 բնակչություն իրազեկվել է հանրային միջոցառումների, մրցույթների, դասընթացների և սոցիալական քարոզարշավների միջոցով,
• Առնվազն 100 տոննա պլաստիկ շիշ վաճառվել է վերամշակող ձեռնարկություններին,
• Համաձայնագրեր են ստորագրվել 4 համայնքների հետ, որտեղ պլաստիկ թափոնները հավաքվում և տեղափոխվում են վերամշակող ընկերություններ։