Լեռնարոտ համայնքում «կանաչ» կենտրոնի հիմնադրում. արևային էներգիայի ներուժի օգտագործում տեղական կարիքների համար

Ծրագրի մանրամասներ և արդյունքներ

Նախագծով նախատեսված է “կանաչ” կենտրոնի ստեղծում Արագածոտնի մարզի Լեռնարոտ համայնքում: Համայնքը գնտվում է լեռնային գոտում, ծովի մակերևույթից 1730մ բարձրության վրա, ինչով և պայմանավորված է տարվա գրեթե վեց ամիս ձգվող ջեռուցման սեզոնը: Համայնքն ունի 450 բնակիչ, որոնց հիմնական զբաղմունքը անասնապահությունն է:
Այս նախագիծը կոչված է ցուցադրելու էներգախնայող ու արևային էներգիան օգտագործող տեխնոլոգիաների հնարավորությունները և առավելությունները, որոնց կիրառումը, ինչպես բնապահպանական, այնպես էլ սոցիալական տեսակետներից նախընտրելի է Հայաստանի լեռնային խիստ կլիմա և արևի ճառագայթման մեծ ներհոսք ունեցող գյուղերի համար:
Առաջարկվող նախագիծը նպաստում է ԳԷՀ-ի Փոքր դրամաշնորհների ծրագրի համընդհանուր նպատակների նվաճմանը, համալիր կերպով և բազմակողմանիորեն համընկնում է ԳԷՀ ՓԴԾ Ազգային ծրագրի գերակայությունների և ռազմավարության հետ, մասնավորապես, անդրադառնում է գլոբալ բնապահպանական խնդիրներին, նպաստում է կլիմայի փոփոխության մեղմմանը, միաժամանակ` տեղական հզորությունների զարգացմանը, անապահով բնակչության սոցիալական հիմնախնդիրների լուծմանը, փորձի և գիտելիքի տարածմանը:

Նախագծի արդյունքները.
• 150 մ2 ընդհանուր մակերեսով համայնքային կենտրոնի կառուցում,
• Արևային ջրատաքացուցիչներ տեղադրում և շինության ջերմամատակարարման իրականացում արևային կոլեկտորների միջոցով ձմռանը, իսկ տաք եղանակներին տաք ջուրը օգտագործել համայնքի կարիքների համար,
• Ամառային ժամանակահատվածում օգտագործվող ցնցուղարանի կառուցում,
• Գյուղի և այլ համայնքների ներկայացուցիչների համար արևային ջրատաքացուցիչ համակարգերի աշխատանքի ուսուցում, ինչպես նաև բնապահպանական խնդիրների վերաբերյալ իրազեկության բարձրացում: